早就听闻加拿大温哥华白话盛行，以自己今年夏季嘅亲身经历，果然名不虚传。中国城.列治文哩啲众多华人聚居嘅地方就唔使讲喇，就连高贵林.素里果啲远离温哥华市中心嘅地区亦系有惊喜发现。周街都有中文招牌，最多就系餐馆.商店。入到去，撞口撞鼻多数都系华人面孔，听嚟听去大部分系广府白话。
售货员或者服务员好多系阿叔阿婶，同老顾客嘅对话更系地道广州风味。果日就听到一个摇轮椅嘅老伯买完白切鸡后，问："好耐唔见芳姐啵!","哦,佢先果排再退多次休，唔使做喇。"斩鸡嘅肥佬笑住答。“佢哩次就系火烧旗杆——长叹（炭）啰。"原来，好多人国内退休后移民嚟加拿大，再就业做到再退休。由于前期华人移民中，较大部分系嚟自香港，佢地将广府白话称为广东话，普通话就称为国语。
大部分中文招牌店铺，店员都兼识国语同广东话。但有时会因为南方老年店员国语唔掂而交流唔够顺畅，有时则系另一种情况。有次听到北方口音顾客问路，华人面孔售货员听后一面茫然，用英语问能否讲广东话。北方顾客好唔高兴，以为俾人歧视。我上前了解，原来店员系俗称嘅"香蕉人"——(喺加拿大出生嘅华裔，黄色皮肤，白人心智）一般唔识中文，要嚟华人店铺就业先至进修（而老师大多系早期移居嘅香港人），佢听唔懂国语情急之下英语脱口而出。一番沟通后大家方挥手笑别。一定要使用国语，去台湾或北方特色店铺就冇撞板。
几个月嚟深刻感受到中国风无处不在，广东话通行无阻。甚至喺中国城或者列治文，唔识英语唔紧要，衣食住用照样咁方便。坐车就要记住英文站名，不过车上大部分系华人，一请教个个都热情解答。果日我就跟住车上一班老伯去到公众市场，喺美食街睇人捉象棋。竟然有十几档咁多，围观喧嚣声中听到一句熟悉嘅白话：“哩盘棋，佢系二叔公莳田——听殃（秧）喇。”简直就系重演广州街头一景。真系：识讲广东话，玩转温哥华；他乡似故乡，享受龙文化。
